Çĕршывăн тĕрлĕ кĕтесĕнче пурăнакан тутарсем Чăваш Енĕн тĕп хулине çĕрпе суха уявне — Сабантуя — пухăннă. Федерацин XVIII Сабантуйне Чăваш Республикин Пуçлăхĕ Михаил Игнатьев тата Тутар Республикин Президенчĕ Рустам Минниханов уçрĕç.
Чăвашсен — Акатуй, тутарсен — Сабантуй. Сĕм авалтан пĕр пĕлтерĕшпе, сăлтавпа паллă тунă уявсем. Тĕлĕнмелле: паянчченех сыхланса юлнă вĕсем. Тутарсен çак уявĕ çинчен аса илме сăлтав пур: паян Шупашкарта федераци шайĕпе ирттерекен XVIII Сабантуй уçăлчĕ.
Ăна Чăваш Ен тĕп хулинчи чи илемлĕ вырăн — Хĕрлĕ тÿрем тата Анне монуменчĕ çывăхĕнчи лапам йышăнчĕç. Анне монуменчĕ çывăхĕнче тутар «ялĕ» ÿссе ларнă. Кунта тăванла халăхăн çемье традицийĕсемпе паллашма, йăли-йĕркисене курса савăнма, хуçалăх таврашĕн илемĕпе киленме пулать.
Чăваш Республики кăçал Пĕтĕм тутарсен XVIII Сабантуйне йышăнать. Ăна çулленех çĕршыври 50 ытла регионта, чикĕ леш енчи 30 патшалăхра паллă тăваççĕ. Федераци шайĕпе ирттерекенни пĕлтĕр Астраханьте пулнăччĕ.
Уяв ыран Чăваш патшалăх оперăпа балет театрĕнче пуçланать. Унта Тутарстанри искусствăсен ăстисен концерчĕ иртет.
Утă уйăхĕн 7-мĕшĕнче Шупашкарти Хĕрлĕ тÿремре федераци шайĕнчи Сабантуй иртет. Унта Раççейри 40 регионтан тутар наципе культура пĕрлĕхĕсен делегацийĕсем килĕç. Тутарстан президенчĕ Рустам Минниханов та килме палăртнă.
Уява çÿллĕ шайра йĕркелĕç: Тутарстанри тата Чăваш Енри солистсен тата пултарулăх ушкăнĕсен концерчĕсем, халăх ăсталăхĕсен куравĕсем, наци кĕрешĕвĕ иртет. Сабантуйра тутар апат-çимĕçне астивме, сувенирсем туянма май пулĕ.
Чăвашла верси
Русская версия
