Общежитисене юсаççĕ

И.Н.Ульянов ячĕллĕ ЧПУра студентсем валли лайăх услови туса парас тĕллевпе нумай ĕç тăваççĕ. Юлашки çулсенче общежитисене хăтлăлатма тытăнчĕç. 2021 çулта акă 2-мĕш общежитие хута янă. Ăна федераци бюджетĕнчен уйăрнă тата аслă шкул хăй ĕçлесе илнĕ укçа-тенкĕпе тунă. Пĕлтĕрех 6-мĕш общежитире строительство ĕçĕсем тума пуçланă. Çуртăн пĕр пайне иртнĕ çулах юсанă, кăçал тепĕр пайне çĕнетеççĕ.

ЧПУн студентсен хулин директорĕн заместителĕ Анатолий Блинов каланă тăрăх, строительсем ĕçе çĕртме уйăхĕнче пуçăннă. Хальхи вăхăтра урайсене, кивĕ пăрăхсене сӳтеççĕ, хăш-пĕр пӳлĕмре стенасене якатма тытăннă. Чӳречесемпе алăксене улăштарĕç, пӳлĕмсене сăрласа илемлетĕç, канализаципе шыв пăрăхĕсене, электрохатĕрсене çĕнетĕç. Прачечнăйсене кĕпе-йĕм çумалли машинăпа тата ытти оборудованипе тивĕçтерме палăртнă. Ĕçе чӳк уйăхĕччен вĕçлемелле.

«Çамрăк гварди» хастарĕсем юсав ĕçĕсем епле пынине тĕрĕслесех тăраççĕ. Общество организацийĕн Чăваш Енри уйрăмĕн ертӳçи Андрей Шакулов каланă тăрăх, пĕлтĕр çамрăк гвардеецсем общество мониторингĕн штабне йĕркеленĕ, Шупашкарти вĕренӳ учрежденийĕсен общежитийĕсене тĕрĕсленĕ. Шел те, вĕсене тĕрĕслев савăнтарман: студентсенчен ытларах пайĕ япăх условире пурăнать. Çĕнĕ Шупашкарти пĕр общежити пурăнма пачах юрăхсăр-мĕн. Патшалăх программипе килĕшӳллĕн кăçал юсав ĕçĕсем тумашкăн федераци бюджетĕнчен университет валли 25 миллион тенкĕ уйăрнă. Тепĕр çул колледжсемпе техникумсен общежитийĕсене юсамашкăн хыснара укçа-тенкĕ пăхса хунă.

ЧПУ студенчĕ Селеста Яковлева общежитин юсанă пайĕнче пурăнать. «Универcитета вĕренме кĕриччен кунти общежитири условисем япăхрах пулнине калатчĕç, çавăнпа юсав вĕçлениччен темиçе уйăх аппа патĕнче пурăнтăм. Халĕ кунта çутă та хăтлă. Хама килти пекех туятăп. Пӳлĕмре виççĕн пурăнатпăр, кашнине кĕтес уйăрса панă. Кухньăра та çĕнĕ оборудовани лартнă. Хăш-пĕр секцире кĕпе-йĕм çумалли машина та пур», — хавхаланчĕ хĕр.

www.hypar.ru Андрей Михайлов сăн ÿкерчĕкĕсем